Ish-kreu i Urdhrit të Stomatologëve, Nikoll Deda, është arrestuar me kërkesë të prokurorit të çështjes, Bledar Valikaj, pasi ndaj tij rëndojnë tre akuza penale: “Vjedhje e kryer duke shpërdoruar detyrën”, “Shpërdorim detyre” dhe “Veprime në kundërshtim me vendimin e gjykatës”.
Prokurori Valikaj argumenton se ekziston rreziku real që Deda të ndërhyjë në provat hetimore ose të largohet nga vendi. “Ekzistojnë shkaqe të rëndësishme që vënë në rrezik marrjen ose vërtetësinë e provës dhe ekziston rreziku i arratisë,” thuhet në njoftimin zyrtar të Prokurorisë së Tiranës.
Hetimi ndaj Dedës nisi pas një denoncimi nga një qytetar, i identifikuar me inicialet A.G., i cili e akuzoi për keqpërdorim të fondeve publike dhe vendimmarrje në kundërshtim me ligjin, përmes rritjes së paarsyeshme të buxhetit të institucionit ndër vite.
Sipas dosjes hetimore, në vitin 2020 buxheti i Urdhrit të Stomatologëve ishte 38.5 milionë lekë. Në vitin 2021, ai u rrit me 13.5 milionë lekë, ndërsa në vitin 2022 arriti në 125.8 milionë lekë, përfshirë blerjen e një godine dhe investimet në të. Prokuroria dyshon se kjo rritje buxheti ka shërbyer për përfitime personale të Dedës ose personave të afërt me të.
Po ashtu, ai akuzohet se ka lejuar punësime të padrejta të familjarëve të tij brenda strukturës së Urdhrit, që nga viti 2016, me qëllim ndikimin në vendimmarrjen e Këshillit Kombëtar.
Autoritetet shtojnë se Deda i është shmangur veprimeve hetimore të policisë gjyqësore dhe se aktualisht është subjekt i një tjetër procesi gjyqësor, ku është i pandehur për veprën penale “Veprime në kundërshtim me vendimin e gjykatës”.
Sipas Prokurorisë, pavarësisht statusit të tij si i pandehur, ai ka vazhduar të ushtrojë ndikim dhe të përqendrojë kompetenca në mënyrë të paligjshme në duart e tij, duke përdorur strukturat e brendshme të Urdhrit të Stomatologëve për qëllime personale.
Njoftimi i Prokurorisë:
PROKURORIA PRANË GJYKATËS SË SHKALLËS SË PARË JURIDIKSIONI I PËRGJITHSHËM TIRANË
Me kërkesë të Prokurorisë Tiranë, caktohet masa e sigurisë ‘Arrest në burg’ për ish-Presidentin e Urdhrit të Stomatologut, N.D. për 3 vepra penale
Me kërkesën e Prokurorisë pranë Gjykatës së Shkallës së Parë të Juridiksionit të Përgjithshëm, Tiranë u ekzekutua masa “Arrest në burg” për shtetasin N.D. për kryerjen e veprave penale “Vjedhje e kryer duke shpërdoruar detyrën”, “Shpërdorim detyre” dhe “Veprime në kundërshtim me vendimin e gjykatës” të parashikuar nga nenet 135, 248 dhe 321 të Kodit Penal.
Ky shtetas u denoncua nga shtetasi A.G. në Seksionin për Hetimin e Krimit Ekonomik e Financiar për shpërdorim të fondeve dhe se ka vepruar në kundërshtim me ligjin duke rritur buxhetin e ‘Urdhrit të Stomatologut’ nga viti në vit.
Në vitin 2020 ku buxheti ishte 38.500.000 Lek, në vitin 2021 e ka shtuar në vitin me 13.500.000 Lek më shumë. Në vitin 2022 buxheti ka shkuar në vlerën 125.837.000 Lek për arsye se ka blerë dhe godinë për institucionin, duke përfshirë dhe investimin që ka bërë brenda godinës.
Nga veprimet hetimore rezultoi se ka dyshime të arsyeshme se gjithë rritja e buxhetit ka qenë me qëllim shpërdorimin e fondeve dhe përfitimeve personale për vete apo persona të tretë.
Prokuroria pranë Gjykatës së Shkallës së Parë të Juridiksionit të Përgjithshëm, Tiranë çmon se në ngarkim të të dyshuarit N.D. ekziston dyshimi i arsyeshëm i bazuar në prova se ka konsumuar elementët e figurës së veprave penale “Vjedhje e kryer duke shpërdoruar detyrën”, “Shpërdorim detyre” dhe “Veprime në kundërshtim me vendimin e gjykatës” të parashikuar nga nenet 135, 248 dhe 321 të Kodit Penal.
Sipas raporti Informacioneve shtetasi N.D. është larguar dhe i është shmangur veprimeve hetimore të kryera nga policia gjyqsore duke e bërë evident e konkret rrezikun e ikjes dhe shgmangies nga pergjegjesia penale. Shtetasi në fjalë në cilësinë e Presidentit të Urdhrit të Stomatologëve lejoi punësimin e njerëzve pa kriter, familjarë të tij, me qëllim manipulimin e vendimmarrjeve të Këshillit Kombëtar nga viti 2016.
Pavarësisht se është marrë i pandehur dhe është aktualisht në proces gjyqësor i akuzuar për nenin 320 të Kodit Penal në një tjetër procedim, ka ndërmarrë veprime aktive në shpërdorim të detyrës për përqendrim të mëtejshëm të kompetencave në duart e tij duke shfrytëzuar strukturat e USSH-së.
Organi i Prokurorisë vlereson se është e nevojshme marrja e masës së sigurimit personal ndaj shtetasit Nikoll Deda, pasi ekzistojnë shkaqe të rëndësishme që vënë në rrezik marrjen ose vërtetësinë e provës dhe ekziston rreziku që ai të largohet.
