Drejtoria Vendore për Kufirin dhe Migracionin Shkodër ka finalizuar me sukses operacionin policor të koduar “Borders 4”, duke goditur një tjetër rast të dhënies ndihmë emigrantëve nga vendet e treta për kalim të paligjshëm të kufijve.
Në pranga ra shtetasi K. Ll., 43 vjeç, banues në Mamurras, i cili u kap në flagrancë në fshatin Vukpalaj, teksa transportonte me automjet 6 emigrantë, përkatësisht 3 shtetas sirianë dhe 3 egjiptianë, që synonin të kalonin ilegalisht drejt Malit të Zi.
Nga hetimet paraprake dyshohet se 43-vjeçari u kishte ofruar ndihmë emigrantëve në këmbim të 400-500 euro për person, pasi ata kishin hyrë në Shqipëri në mënyrë të jashtëligjshme përmes zonës së Qafë Botës. Më pas, ai i transportonte drejt zonës kufitare me Malin e Zi për t’i kaluar ilegalisht.
Policia bën me dije se i arrestuari është i dënuar më parë për të njëjtën veprimtari kriminale. Në cilësinë e provës materiale u sekuestruan automjeti me të cilin kryente transportin dhe telefoni i tij.
Vijojnë hetimet për dokumentimin e plotë të rrjetit të mundshëm dhe identifikimin e personave të tjerë të përfshirë në këtë aktivitet të paligjshëm.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme.
