Pas një operacioni të zhvilluar nga Drejtoria Vendore e Policisë Dibër, në bashkëpunim me njësinë e inteligjencës policore, është vënë në pranga shtetasi E. E., 19 vjeç, i cili ishte shpallur në kërkim disa ditë më parë.
I riu u arrestua si i dyshuar për plagosjen me mjet prerës të një shtetasi, gjatë një konflikti të ndodhur më 13 prill 2025, në lagjen “Dobrovë” të qytetit të Peshkopisë.
Sipas njoftimit zyrtar të policisë, ngjarja ka ndodhur për motive të dobëta. Fatmirësisht, i plagosuri ndodhet jashtë rrezikut për jetën dhe vijon trajtimin mjekësor në spitalin e qytetit.
Në kuadër të hetimeve të mëtejshme, janë proceduar penalisht në gjendje të lirë edhe tre persona të tjerë, të cilët dyshohet se kanë qenë në dijeni të ngjarjes dhe e kanë fshehur atë duke mos e kallëzuar pranë autoriteteve.
Njoftimi i policisë:
Si rezultat i kontrolleve intensive, të kryera nga shërbimet e Drejtorisë Vendore të Policisë Dibër dhe të mbështetura te informacionet e siguruara nga inteligjenca policore, u kap dhe u ndalua shtetasi E. E., 19 vjeç, banues në Peshkopi.
Ai u shpall në kërkim më datë 13.04.2025, pasi dyshohet se gjatë një konflikti për motive të dobëta, në lagjen “Dobrovë”, Peshkopi, ka goditur me mjet prerës, shtetasin E. Sh., 20 vjeç.
Dje, u proceduan në gjendje të lirë 3 shtetas, për moskallëzim të këtij krimi.
Ndërkaq, i dëmtuari vijon të jetë në kujdesin e mjekëve dhe jashtë rrezikut për jetën.
Materialet procedurale iu referuan Prokurorisë së Dibrës, për veprime të mëtejshme, për veprën penale “Plagosja e rëndë me dashje”.
