Një i burgosur shqiptar ka arritur që të arratiset nga burgu i Dozzas në Bolonja. Sipas mediave vendase mësohet se ngjarja ka ndodhur mbrëmjen e 29 marsit, ku 34-vjeçari shqiptar i identifikuar si Fatbardh Mneraj është arratisur teksa ishte duke u transportuar në burgun e Dozzas.
Mësohet se 34-vjeçari i dënuar për grabitje e kalonte ditën në liri, por i është njoftuar mbrëmjen e 29 marsit se do të duhej të kthehej në seksionin e brendshëm të burgut, duke humbur privilegjin, pas një dënimi tjetër.
Sipas asaj që mediat italiane raportojnë, gjatë transferimit, 34-vjeçari është arratisur në drejtim të paditur pa lënë asnjë gjurmë.
Tanimë policia italiane është “ngritur në këmbë” dhe ka shpërndarë kudo foton e shqiptarit.
Seksioni për të burgosurit “gjysmë të lirë” është brenda oborrit të Dozza-s, por është i ndarë nga ndërtesa e burgut me masa më të rrepte sigurie.
Si funksionon regjimi i gjysëm-lirisë?
Është një nga përfitimet e parashikuara për të burgosurit që vendoset nga Gjykata.
I dënuari lejohet të kalojë një pjesë ose të gjithë ditën jashtë burgut për të marrë pjesë në aktivitete pune ose edukative.
Por si çdo përfitim, edhe ky mund të revokohet. Për t’u pranuar një lehtësim i tillë, i burgosuri duhet të ketë kryer të paktën gjysmën e dënimit, por gjithashtu duhet që dënimi total të jetë më i gjatë se 6 muaj heqje lirie.
