Presidenti i Federatës Shqiptare të Futbollit, Armand Duka, ka reaguar pas fitores 3-0 të Shqipërisë ndaj Andorrës. Nëpërmjet një postimi në rrjetet sociale, Duka ka përgëzuar skuadrën për paraqitjen e saj dhe ka theksuar se kjo është vetëm fillimi, duke shtuar se ka ende shumë rrugë për të ecur.
Presidenti i FSHF-së ka ftuar të gjithë të besojnë tek këta djem dhe ka nënvizuar se tani është momenti për të festuar këtë fitore, por gjithashtu për të vazhduar punën për sfidat që vijnë.
Reagimi i plotë:
“Rikthehemi në shtëpi, rikthehemi te fitorja, me lojë bindëse! Ishte pikërisht ajo që na duhej ndaj Andorrës, ishte një detyrim për vetë faktin që duam të ëndërrojmë deri në fund për të synuar një vend në Botërorin 2026. Janë tre pikët e para për skuadrën, që e përgëzoj për paraqitjen e bërë. Është vetëm fillimi, ka shumë rrugë përpara.
Të gjithë duhet të kemi besim te këta djem, janë të njëjtët që na kanë bërë krenarë deri më tani, që na kanë çuar në Europian, që kanë dhënë emocione, që na kanë dhënë mundësinë të ndjehemi krenarë kudo. Le të festojmë këtë fitore dhe të punojmë për të tjera në vazhdim!”
