Celtic po ndjek nga afër situatën e Armando Brojës, i cili është rikthyer në qendër të merkatos së verës. Largimi i tij nga Chelsea konsiderohet i sigurt, dhe disa klube të njohura europiane kanë shfaqur interes për sulmuesin shqiptar.
Celtic ka si objektiv përforcimin e repartit ofensiv dhe 23-vjeçari shihet si një alternativë e mundshme. Pas një sezoni të vështirë të shoqëruar nga dëmtime, Broja është tashmë plotësisht i rikuperuar dhe gati për një kapitull të ri në karrierë.
Gjatë sezonit të fundit, Broja ishte i huazuar te Evertoni, ndërsa karta e tij vazhdon të jetë në pronësi të Chelsea-t deri në vitin 2028. Ende nuk është e qartë nëse destinacioni i tij i radhës do të jetë një tjetër huazim apo një transferim i përhershëm.
Përveç Celtic, për Brojën janë përmendur edhe emra të tjerë të rëndësishëm si Milan, Ajax, PSV dhe Leipzig, klube që po e monitorojnë nga afër situatën e tij dhe mund të hyjnë në garë për firmën e tij gjatë verës.
