Më 17 nëntor 2025, Policia e Kosovës njoftoi se arinjtë “vizitorë” që u shfaqën pranë shkollës në fshatin Bellobrad të Dragashit janë larguar me sukses, pa lënë as fletë-rrufe e as kërkesë për regjistrim në klasë të pestë.
Operacioni u realizua në koordinim me Agjencinë për Mbrojtjen e Mjedisit, Parkun Kombëtar “Sharri” dhe Shoqatën e Gjuetarëve me emrin modest “Dhia e Egër”.
Autoritetet ngritën patrullime të shtuara, ndërsa policia tha se arinjtë “u kthyen në habitatin e tyre natyror”, që do të thotë se morën rrugën drejt pyjeve, aty ku nuk ka zile shkollash, fëmijë të gëzuar apo sallam nëpër çanta.
Kërkesa për ndërhyrje erdhi nga shkolla “Sezai Surroi”, ku mësuesit dhe prindërit kishin shprehur shqetësime të arsyeshme.
Jo çdo ditë sheh një ari te porta e shkollës, e sidomos në mëngjes kur edhe mësuesit mezi e gjejnë motivimin, e jo më të përballojnë një kafshë që peshon sa tri ditarë mësuesorë bashkë.
Pas largimit të arinjve, policia siguroi banorët se zona është e sigurt. “Falënderojmë të gjitha institucionet dhe gjuetarët për bashkëpunimin”, u tha në njoftim.
Me pak fjalë: operacioni shkoi vaj, fshati mori frymë lirisht dhe arinjtë u kthyen aty ku duhet, larg nga fëmijët e vogël por shumë më të zhurmshëm se çdo kafshë e egër.
Komuniteti i Bellobradit tani mund të qetësohet, ndërsa arinjtë, me gjasë, po tregojnë historinë e tyre në ndonjë trung pylli: “Shkuam te shkolla… por s’na pranuan.”
