Ruben Saraiva, vrasësi me origjinë portugeze i biznesmenit lezhjan Ardian Nikulaj, është dënuar dje nga Gjykata e Lezhës me burgim të përjetshëm, pa të drejtë apelimi. Pra, tani pjesën tjetër të jetës do e kalojë në qelitë e burgjeve shqiptare.
Tabloidi britanik “Daily Mail” ia ka kushtuar një artikull të gjatë krimit makabër që tronditi Shqipërinë dy vite më parë, ndërsa jep dhe detaje nga ajo që ka ndodhur dje në sallën e gjyqit.
Nën masa të rrepta sigurie dhe i shoqëruar nga Forcat Operacionale të Brugjeve, Ruben Saraiva ka qenë i qetë gjatë gjithë kohës që dje shpallej dënimi, me median britanike që thotë se ai madje ka tundur kokën kur gjyqtari i tha se pjesën tjetër të jetës do e kalonte në qeli.
Gjithashtu, “Daily Mail” shkruan se vrasësi portugez që u rrit në Angli që nga mosha 4 vjeçare, ishte i veshur me kostum sportiv “Nike” dhe teksa qëndronte indiferent dhe bënte gjeste, pranë kishte gruan e biznesmenit që vrau, të venë e Ardian Nikulaj.
“Mes masave të rrepta sigurie në Gjykatën e Lezhës në veri të Shqipërisë, gjykatësi i lartë Lirim Bulica i tha Saraivës se do ta kalonte pjesën tjetër të jetës së tij në një burg të sigurisë së lartë, pasi e shpalli fajtor për vrasje me paramendim në bashkëpunim me të tjerë dhe posedim të paligjshëm të armëve.
I veshur me një tuta të zeza Nike, ndërsa qëndronte disa metra larg gruas së viktimës së tij, Saraiva tundi kokën në bankën e të akuzuarve me fasadë xhami ndërsa u dha vendimi”, thuhet në artikullin e medias britanike, e cila raporton dhe për hasmërinë e fisit Lekstekaj me atë Nikulaj.
Sipas “Daily Mail”, britanikët u përzgjodhën për të kryer operacionin sepse, ndërsa Ardian Nikulaj ishte në gatishmëri për vrasës të mundshëm vendas, ai kurrë nuk do të kishte dyshuar për ndonjë rrezik nga vizitorët nga Anglia, pretenduan prokurorët.
Ruben Saraiva qëndroi në një apartament në Shëngjin për disa ditë, ndërsa britanikët e tjerë u regjistruan në hotelin e sapohapur të Nikulajt, ku u paraqitën si turistë për të spiunuar atë dhe familjen e tij, e cila gjithashtu punonte atje.
“Ata thuhet se kanë pranuar ushqim falas nga viktima e tyre, kanë biseduar me gruan e tij dhe janë miqësuar me djalin e tij atëherë 13-vjeçar, ndërsa gjurmonin lëvizjet e objektivit të tyre përpara se njëri prej tyre t’i jepte sinjalin Saraivës për ta ekzekutuar”, thuhet në artikull.
Nuk dihet se sa iu ofrua Ruben Saraivës për rolin e tij në operacion, por familja e Nikulajt tha se ishin paralajmëruar më parë se vrasës të tjerë të mundshëm vendas kishin refuzuar më parë pothuajse 1 milion paund për ta vrarë atë.
Edmond Haxhia dhe britanikët e tjerë të akuzuar si pjesë e grupit, Harriet Bridgeman, 28 vjeç, Thomas Mithan, 35 vjeç, dhe Steven Hunt, 50 vjeç, të cilët janë të gjithë nga Bristoli, dhe Harry Simpson, 33 vjeç, nga jugu i Londrës, u kthye në Mbretërinë e Bashkuar pak para ose menjëherë pas vrasjes.
Ata u arrestuan më vonë dhe aktualisht po presin të dëgjojnë vendimin në apelin e tyre kundër ekstradimit në Shqipëri për t’u përballur me gjyqin. Të gjithë mohojnë përfshirjen në sulm.
Në një deklaratë, familja Nikulaj e mirëpriti seancën dëgjimore të së enjtes si një “hap përpara në ofrimin e drejtësisë për Ardianin”, por shprehu shqetësim për vonesën në ekstradimin e të dyshuarve të tjerë nga Mbretëria e Bashkuar.
“Brutaliteti i ekzekutimit të Ardianit me gjashtë plumba nga Ruben Saraiva, i cili tani është dënuar nga drejtësia shqiptare, është një plagë që nuk do të shërohet kurrë – veçanërisht për fëmijët e Ardianit, të cilët po rriten pa ngrohtësinë e babait të tyre.
Pavarësisht vendimit të sotëm në lidhje me Ruben Saraiva, ne vazhdojmë të ndihemi të lënduar nga fakti që Ardiani i trajtoi të gjithë individët britanikë që erdhën në hotelin e tij si turistë dhe me një respekt të thellë, por në realitet, dyshojmë se kishin ardhur me qëllimin për ta mbikëqyrur atë në mënyrë që më vonë të vritej nga bashkëpunëtori i tyre, Ruben Saraiva.”
Ata shtuan se nuk do të ketë “drejtësi të plotë” për Ardianin dhe jo paqe për familjen Nikulaj nëse ata që urdhëruan dhe financuan vrasjen nuk “identifikohen dhe nuk sillen para drejtësisë”.
