Bota po pret në ankth se kur dhe si do t’i përgjigjet Izraeli sulmit masiv me raketa nga Irani të martën mbrëma.
Ajo që është e sigurt është se Izraeli do të dëshirojë t’i përgjigjet Iranit, raporton analisti i Sky News, Michael Clarke, duke shtuar megjithatë se ekziston mundësia që kjo të bëhet në një mënyrë që “mbyll” fazën e re të tensionit në Lindjen e Mesme.
“Izraeli me siguri do të dëshirojë të përgjigjet sepse nuk dëshiron të lejojë krijimin e një norme të re, që Irani të mund të lëshojë raketa në territorin izraelit. Tel Avivi dëshiron që përgjigja të jetë më e fortë se sulmi, por do të përballet me presionin e aleatëve të tij”, përshkruan analisti britanik.
Ajo që kombet perëndimore do t’i thonë Benjamin Netanyahut është “nëse do të përgjigjeni, bëjeni në një mënyrë të kujdesshme, me qëllim që tensionet të shuhen”, shtoi analiza.
Sidoqoftë, analisti i Sky News nuk është i sigurt nëse Netanyahu është në gjendje ta bëjë këtë, pasi izraelitët mendojnë se mund të mposhtin të gjithë armiqtë e tyre, përfshirë Iranin, në të njëjtën kohë.
“Nëse ai do të jetë në gjendje të mbyllë “kapakun” e tensioneve do të varet nga mënyra se si izraelitët e strukturojnë reagimin e tyre, që unë vlerësoj se do të shpaloset në 24-48 orët e ardhshme”, përfundon analisti britanik./ilirianews
