Pas barazimit të hidhur të Milanit me Genoa, Massimiliano Allegri nuk i kurseu fjalët dhe doli hapur me atë që, sipas tij, po i mungon skuadrës së tij: instinkti për ta mbyllur ndeshjen kur kundërshtari lodhet — një cilësi që ai thotë se Interi e ka më shumë.
Në prononcimin e tij për Sky, në një bisedë me Billy Costacurta, Allegri e përshkroi problemin me një krahasim të qartë: dikur ekipet “e vogla” vinin në San Siro dhe mendonin se po bënin ndeshje të mirë deri rreth minutës së 60-të. Pastaj, sipas tij, nis “një ndeshje tjetër”, sepse ekipi i madh rrit ritmin, nuk ndalet së vrapuari dhe e mbyll gjithçka shpejt.
“Deri në minutën e 60-të mendonin se kishin bërë ndeshje të mirë. Pastaj fillonte një tjetër ndeshje, sepse ti s’ndaloje së vrapuari dhe ata thoshin: ‘Ja, në rregull… një, dy, tre.’ Mbaroi loja. Inter e kanë këtë, ne duhet ta marrim. Mjafton të shikosh sa qetë i menaxhon Interi ndeshjet,” u shpreh Allegri.
Trajneri e lidhi këtë edhe me “sëmundjen” që Milani po e vuan shpesh këtë sezon: vështirësinë për të ruajtur intensitetin dhe për t’i “shuar” ndeshjet edhe kur kundërshtari është në telashe. Dhe kur u pyet për garën e titullit, Allegri foli pa filtra: sipas tij, dy skuadra janë dukshëm më të forta se të tjerat.
“Nuk e them për bestytni: dy ekipet që janë qartësisht më të forta se të tjerat janë Interi dhe Napoli. Pikë. Kaq.” — ishte mesazhi i prerë i tij, duke nënkuptuar se Milani duhet të rritet shpejt nëse do të futet realisht në garë.
