Këngëtari nga Shkodra, Alis, ka triumfuar në Festivalin e 64-t të Këngës në RTSH me këngën e tij “Nan”. Ai arriti të fitojë jo vetëm zemrat e publikut, por edhe vlerësimin maksimal të jurisë, duke siguruar kështu të drejtën për të përfaqësuar Shqipërinë në Eurovision 2026, që do të zhvillohet në Vjenë të Austrisë.
Alis, djaloshi që të gjithë e njohim për vokalin e fuqishëm e solli “Nan” ashtu si dhe ai di dhe ashtu si ky Festival e meriton!
Trofeun, artisti e mori nga kryetari i jurisë, Ramë Lahaj, pasi fitoi gjithsej 152 pikë nga kombinimi i votave të publikut dhe pikëve të jurisë. Inis Neziri përfundoi e dyta me 102 pikë, ndërsa Sheila u rendit e treta me 93 pikë.
Në klasifikimin profesional të jurisë, vendi i parë shkoi për Alis, vendi i dytë për Sheila dhe vendi i tretë për Vedat Ademin. Formula e votimit ndahej mes jurisë dhe publikut, nga 50% secila, duke siguruar kështu një përfundim transparent dhe të drejtë.
