Pas akuzave të hedhura nga opozita, në media u përhap gjerësisht lajmi se aksioni i zhvilluar nga SPAK dhe Byroja Kombëtare e Hetimit (BKH) në një prej kullave të Tiranës, pranë zonës së “Myslym Shyrit”, kishte si objekt një biznes të lidhur me Alba Ballën, motrën e kreut të grupit parlamentar të Partisë Socialiste.
Në reagim ndaj këtyre pretendimeve, Alba Balla ka dalë publikisht duke i mohuar në mënyrë kategorike akuzat. Ajo ka deklaruar se nuk ka asnjë lidhje, interes apo marrëdhënie me kompaninë ku SPAK ka ushtruar kontrolle, gjatë të cilave janë sekuestruar shuma të mëdha parash cash dhe dhjetëra portofola me kriptomonedha.
Sipas saj, këto akuza janë të pavërteta dhe me prapavijë dashakeqe, me synim dëmtimin e figurës së saj dhe të vëllait. Balla ka theksuar se është e gatshme të bashkëpunojë me institucionet dhe të përballet me këdo për të sqaruar çdo paqartësi dhe për të zbardhur të vërtetën.
Reagimi i plotë i Alba Ballës:
“Lajmet që kanë qarkulluar sot në lidhje me mua dhe që, për pasojë, kanë përfshirë edhe vëllain tim, janë tërësisht të pavërteta dhe dashakeqëse. I përgënjeshtroj kategorikisht, me përgjegjësi të plotë.
Nuk kam asnjë njohje, asnjë lidhje dhe asnjë marrëdhënie me kompaninë e përmendur në këto pretendime. Jam plotësisht e gatshme të përballem me çdo institucion, media apo individ, për të sqaruar të vërtetën time, e cila është një dhe e vetme.”
