Ministrat Delina Ibrahimaj dhe Blendi Gonxhja kanë reaguar të pikëlluar për ndarjen e parakohshme dhe të padrejtë nga jeta të Elizabeta Katiaj, nënkryetares së Dhomës së Biznesit të Diasporës Shqiptare.
Elizabeta Katija, 43 vjeçe (drejtuesja e mjetit) dhe Eorda Sinollari, 32 vjeçe (pasagjere), u aksidentuan këtë të premte në aksin Prizren-Suharekë, ku makina e tyre me targa shqiptare është përplasur me një kamion dhe ndërruan jetë në vendngjarje.
“Me dhimbje të thellë mora lajmin për ndarjen nga jeta të Elizabeta Katiaj. Elizabeta u nda nga jeta në mënyrë të beftë, duke lënë pas një kontribut të çmuar në shërbim të diasporës shqiptare, zhvillimit të biznesit dhe fuqizimit të grave sipërmarrëse.
Si grua që besonte thellësisht në fuqinë e grave dhe si bashkëpunëtore e saj, pata mundësinë të njoh nga afër përkushtimin, forcën dhe profesionalizmin me të cilat shërbeu diasporës shqiptare dhe, veçanërisht, fuqizimit të grave shqiptare kudo në botë”, shkruan ministrja Delina Ibrahimaj.
Ministrja e Ekonomisë dhe Inovacionit thotë se kontributi i Elizabeta Katiaj do të mbetet frymëzues për të gjitha gratë në zhvillim, sipërmarrje dhe bashkëpunim. Delina Ibrahimaj shpreh ngushëllimet më të sinqerta për familjen, të afërmit dhe miqtë në këtë moment dhimbjeje të thellë.
Edhe ministri i Turizmit, Kulturës dhe Sportit, Blendi Gonxhja shkruan se kontributi, përkushtimi dhe energjia do të kujtohen gjithmonë me respekt dhe mirënjohje.
“I rëndë lajmi për ndarjen tragjikisht nga jeta, në moshë të re, të Elizabeta Katiaj, nënkryetares së Dhomës së Biznesit të Diasporës Shqiptare. Ngushëllimet më të sinqerta familjes, miqve dhe gjithë bashkëpunëtorëve të saj. Kontributi, përkushtimi dhe energjia që ajo dha, do të kujtohen gjithmonë me respekt dhe mirënjohje. Lamtumirë, Elizabeta”, shkruan Gonxhja.
