Një ditë pas aksidentit tragjik në Kryebushat me 1 viktimë dhe 3 të plagosur, policia e Shkodrës ka bërë ndalimin e drejtuesit të kamionit, 42 vjecarit me inicialet T.K.
Grupi hetimor e bën shkaktar të aksidentit, pasi në momentin që ka humbur kontrollin e drejtimit të mjetit të tonazhit të rëndë, ai është përplasur fillimisht me mjetin tip furgon që drejtohej nga një 63 vjecar, e më pas u përfshi edhe vetura ku udhëtonte familja Bzhangaj, ku viktimë mbeti kryefamiljari 37 vjecar Gjin Bzhangaj, ndërsa bashkëshortja 32 vjecare dhe dy fëmijët u plagosën.
Gjatë të shtunës spitalin e ka lënë nëna me djalin e mitur, pasi kanë kaluar rrezikun për jetën.
Ndërkohë vajza e mitur për shkak të gjendjes më të rëndë, është dërguar në Spitalin e Traumës në Tiranë për mjekim më të specializuar.
Grupi hetimor në vendngjarje ka punuar për rindërtimin e plotë të skemës së aksidentit, në këtë segment rrugor me frekuentim të lartë.
