Katër të rinj humbën jetën tragjikisht mbrëmjen e djeshme në një aksident të rëndë në aksin Fushë-Krujë-Vorë, pranë Fushë-Prezës.
Makina tip “Benz” me të cilën ata po udhëtonin u përplas fort me një betoniere dhe shpërtheu në flakë. Të rinjtë janë identifikuar Enejdi Laçi, Erildi Laçi (vëllezër), Enrikejd Kurti dhe Andi Laçi, me moshë nga 20 deri në 25 vjeç.
Aksidenti ndodhi rreth orës 23:50, në fshatin Fushë-Prezë. Pavarësisht ndërhyrjes së zjarrfikësve nga Kamza, nuk mund të shmangej tragedia, pasi makina ishte e pajisur me impiant gaz-benzinë.
Shoferi i betonieres, Aleksandër Krrashi, një 24-vjeçar, fillimisht u largua nga vendi i ngjarjes, por më pas u arrestua nga policia dhe u shoqërua në Komisariat për hetime të mëtejshme. Policia po vazhdon hetimet për të zbardhur plotësisht shkaqet e këtij aksidenti.
