Dy aksidente të njëpasnjëshme tronditën autostradën A3 në drejtim të Cyrihut mbrëmjen e së hënës, ku si pasojë një burrë 50 vjeçar humbi jetën, ndërsa disa persona të tjerë u lënduan. Shkak fillestar i ngjarjeve dyshohet të ketë qenë një 18-vjeçar me prejardhje nga Kosova.
Aksidenti i parë ndodhi në orën 20:45 të mbrëmjes, teksa i riu shqiptar i Kosovës me banim në rajonin Fricktal po drejtonte një BMW 330 kabriolet drejt Cyrihut.
Ai humbi kontrollin e automjetit, u përmbys dhe u përplas me barrierën e mesit të autostradës. I riu u dërgua me ambulancë në Spitalin Universitar të Bazelit dhe raportohet se lëndimet e tij nuk janë serioze. Makina u shkatërrua plotësisht.
Shkaqet e sakta të aksidentit janë ende të paqarta, por dyshimet janë se shpejtësia e tepërt ka luajtur rol. Provat tregojnë gjithashtu se dy automjete të tjera BMW, të drejtuara nga shokë të shqiptarit – një zviceran 18-vjeçar dhe një italian i së njëjtës moshë nga rajoni i Fricktal – mund të kenë qenë të përfshira në aksident, sepse kanë qenë duke bërë gara.
Policia kantonale e Aargaut ka arrestuar përkohësisht dy shoferët, siç thuhet në një njoftim për shtyp, ndërsa Zyra e prokurorit publik të Rheinfelden-Laufenburg ka hapur një hetim penal, raporton media zvicerane 20min.ch
Gjatë hetimit të aksidentit, policia kantonale u detyrua të mbyllte korsinë e djathtë që shkonte drejt Cyrihut, e cila rezultoi në një radhë disa qindra metra të gjatë. Në fund të kësaj radhe ishte një kamion me gjysmërimorkio kur, në orën 23:40, një Volvo u përplas në pjesën e pasme të rimorkios dhe fut poshtë saj.
Ekipet e ndihmës së shpejtë e gjetën shoferin e Volvos të plagosur rëndë dhe filluan masat e ndihmës së shpejtë, por nuk arritën ta shpëtonin. Ai ishte një gjerman 50-vjeçar, banor i kantonit Schëyz. Shoferi i kamionit nuk u lëndua, kurse Volvo e viktimës u shkatërrua plotësisht dhe gjysmërimorkioja e kamionit u dëmtua gjithashtu.
Për shkak të përmasave të aksidentit të dytë, autostrada A3 drejt Cyrihut u desh të mbyllej plotësisht. Me ndihmën e shërbimit të mirëmbajtjes (NSNË) dhe zjarrfikësve, trafiku u devijua përmes një porte fabrike pranë Zeiningen dhe vazhdoi rrugën e tij jashtë qytetit.
Mjetet e bllokuara në trafikun e krijuar u detyruan të ktheheshin nën mbikëqyrjen e policisë dhe shërbimit të mirëmbajtjes në mënyrë që të largoheshin edhe ato nga autostrada. Vendi i aksidentit u pastrua plotësisht deri në orën 6:30 të mëngjesit të së martës.
