Një aksident trefishtë ka ndodhur mbrëmjen e sotme në aksin rrugor Levan-Pishporo në vendin e quajtur Qarr. Tre makina janë përplasur me njëra-tjetrën, duke lënë të lënduar katër persona.
Një prej automjeteve ka përplasur 36 krerë dhen, të cilat kanë qenë duke kaluar rrugën.
Paraprakisht dyshohet se shkak ka qenë shpejtësia e lartë me të cilën po udhëtonin drejtuesit e automjeteve, ndërkohë që në vendngjarje ndodhet policia dhe grupi hetimor.
Njoftimi i Policisë:
Fier/ Informacion paraprak
Rreth orës 18:40, në aksin rrugor “Levan-Qarr”, automjeti me drejtues shtetasin L. Dh., është përplasur me automjetin me drejtues shtetasin E. K., dhe me automjetin me drejtues shtetasin B. S.
Si pasojë e përplasjes janë dëmtuar shtetasit L.Dh., dhe 3 pasagjerë të cilët ndodhen në spital për ndihmë mjeksore, jashtë rrezikut për jetën.
Gjithashtu nga përplasja e automjeteve në rrugë janë dëmtuar bagëtitë e imta të shtetasit N. M.
Grupi hetimor ndodhet në vendngjarje dhe po punon për sqarimin e plotë të rrethanave dhe shkakut të aksidentit.
