Një aksident rrugor ka ndodhur në kryqëzimin e Gjadrit, ku janë përplasur dy automjete, duke shkaktuar dëme të mëdha materiale.
Sipas të dhënave paraprake, një automjet tip Volkswagen, që po dilte nga rruga dytësore e Kodhelit për t’u bashkuar me superstradën dhe vazhduar drejt Gjadrit, ka goditur një automjet tip Skoda, i cili po lëvizte në drejtim të Shkodrës.
Si pasojë e përplasjes, mjeti Skoda ka përfunduar jashtë rrugës, por fatmirësisht drejtuesit e të dy mjeteve kanë shpëtuar pa pësuar lëndime. Policia rrugore ka mbërritur menjëherë në vendngjarje dhe ka nisur hetimet për të zbardhur rrethanat e plota të aksidentit.
Nga verifikimet paraprake, është konfirmuar se asnjëri prej drejtuesve të mjeteve nuk ka qenë nën ndikimin e alkoolit.
