ARRSH njoftim mbi situatën në segmetin Librazhd-Përrenjas, i cili mbetet i bllokuar për shkak të rrëshqitjeve masive të tokës dhe paqëndrueshmërisë së terrenit në zonën “Arrat e Gurrës”.
ARRSH rekomandon përdorimin e itinerareve alternative si Maliq-Lozhan-Strelc-Gramsh-Elbasan apo Qafë Thanë-Pogradec-Korçë-Leskovik-Përmet-Tepelenë për autovetura, dhe për mjetet e tonazhit të rëndë itinerarin përmes Pikës Doganore Qafë Thanë – Maqedoni – Bllatë – Rruga e Arbërit. Respektoni sinjalistikën dhe udhëzimet e Policisë Rrugore deri në normalizimin e qaarkullimit.
“Qarkullimi në segmentin rrugor në zonën e Arrat e Gurrës, pjesë e aksit Librazhd-Pogradec, do të vijojë të jetë i bllokuar për shkak të rrëshqitjeve masive të dheut që e kanë bërë këtë pjesë të pakalueshme dhe të pasigut për lëvizjen e mjeteve dhe këmbësorëve.
Ndërsa në terren po kryhet një rivlerësim urgjent gjeologjik dhe teknik për shkak të paqëndrueshmërisë së terrenit, autoritetet rrugore theksojnë rëndësinë e përdorimit të akseve alternative për të shmangur problemet në qarkullim.
ARRSH bën të ditur se drejtuesit e autoveturave mund të përdorin itinirarin Maliq-Lozhan-Strelc-Gramsh-Elbasan, si dhe edhe aksin Qafë Thanë-Pogradec-Korçë-Leskovik-Përmet-Tepelenë, duke garantuar kështu vijimësinë e lëvizjes në juglindje të vendit.
Ndërkohë, për mjetet e tonazhit të rëndë rekomandohet devijimi përmes Pikës Doganore Qafë Thanë drejt Maqedonisë, më pas nga Pika Doganore e Bllatës dhe vijimi në Rrugën e Arbrit, si alternativa më e përshtatshme për përballimin e fluksit dhe garantimin e sigurisë rrugore”, njofton ARRSH.
ARRSH apeloi drejtuesit e mjeteve dhe banorët e zonës për respektim të sinjalistikës dhe udhëzimeve të Policisë Rrugore deri në stabilizimin e plotë të situatës.
