Bashkëshortja e kryetarit të bashkisë së Tiranës, Erion Veliaj, Ajola Xoxa ankimon vendimin në GJKKO për ushtrimin e kontrollit në banesë, që në fundjavën e kaluar BKH-ja i sekuestroi telefonin.
Me urdhër të Gjykatës së Posaçme kundër Korrupsionit dhe Krimit të Organizuar, oficerët e policisë gjyqësore ushtruan kontrolle në zyrat e kompanisë së bashkëshortes së kryebashkiakut të Tiranës Erion Veliaj, ndërsa më parë i kishin sekuestruar dhe telefonin celular. Kontrolle u ushtruan dhe në banesën e vëllait të zotit Veliaj, i cili ndodhej në Austri.
Vetë Prokuroria e Posaçme nuk dha detaje, por u mjaftua të shpjegojë se ka kryer disa “veprime hetimore në kuadër të një procedimi penal”.
Ndaj Veliajt ka nisur një hetim pasuror, ndërsa po shihet dhe roli i tij në rastin e inceneratorit të Tiranës si dhe në çështjen e kompanisë “5D”, që zotërohej nga ish drejtorë të Bashkisë. Veliaj reagoi duke deklaruar se mbështet në çdo hap veprimet e Prokurorisë.
