Edhe pse kanë kaluar tashmë tetë muaj nga ndarja e parakohshme nga jeta e ish-deputetit Gerti Bogdani, dhimbja mbetet e pranishme në familjen e tij, në zemrën e bashkëshortes Edlira dhe të fëmijëve të tyre, Ajra dhe Reinarti. Humbja është e madhe, por ata po vazhdojnë përpara, të mbështetur tek dashuria dhe kujtimet që Gerti u la pas.
Së fundmi, Edlira Çepani ishte e ftuar në Euronews Albania, ku foli me emocione për mungesën e bashkëshortit të saj. Mes lotësh, ajo tregoi se sa i pranishëm vijon të jetë Gerti në jetën e tyre, pavarësisht se fizikisht nuk është më aty.
“Patjetër që më mungon gjysma ime më e mirë,” tha Edlira. “Por ai na ka lënë aq shumë dashuri sa duket sikur ende është pranë nesh. Na ka lënë dashuri për tre jetë. Edhe pse jeta pa të mund të jetë e gjatë apo e shkurtër, ajo nuk do të jetë kurrë pa Gertin. Ai është gjithmonë me ne. Ajo që na mungon më shumë janë këshillat e tij të mençura, parashikimet e sakta, mbështetja e tij e palëkundur. Më mungon ajo ndjesi që çdo arritje, sado e vogël, ndanim bashkë. Ai ishte një nga mbështetësit e mi më të mëdhenj.”
Gerti Bogdani, një politikan i respektuar i Partisë Demokratike, u nda nga jeta papritur më 18 shtator, ndërsa ndodhej në ambientet e hotelit “Rogner” në Tiranë për një takim me kolegë dhe miq. Ai pësoi një atak të papritur në zemër dhe, megjithëse u dërgua menjëherë në spital, mjekët nuk arritën ta shpëtonin.
