Situata mes Enzo Fernández dhe Chelseat po bëhet gjithnjë e më e tensionuar. Pas komenteve të mesfushorit argjentinas, ku tha se do të donte të jetonte në Madrid sepse i ngjan Buenos Airesit, trajneri Liam Rosenior konfirmoi se lojtari do të humbasë dy ndeshjet e ardhshme si ndëshkim për mosrespektim të vlerave të klubit.
Agjenti i tij, Javier Pastore, reagoi ashpër për The Athletic, duke thënë se Enzo nuk e kupton fare këtë vendim. Sipas tij, futbollisti nuk ka thënë në asnjë moment se dëshiron të largohet nga Chelsea apo nga Londra dhe nuk ka treguar mungesë respekti ndaj klubit.
Pastore e cilësoi pezullimin si të padrejtë dhe tepër të ashpër, sidomos në një moment delikat të sezonit për Chelsean në garën për Champions League. Ai shtoi se Enzo e ka pranuar vendimin si profesionist, por la të kuptohet se klubi po përpiqet të japë një mesazh më të madh përmes kësaj lëvizjeje.
Agjenti foli edhe për të ardhmen e lojtarit, duke theksuar se përtej kontratës, rëndësi kanë edhe paga, respekti dhe mënyra si menaxhohet situata. Sipas tij, pezullimi i zëvendëskapitenit tregon se brenda klubit po ndodhin lëvizje që mund të sqarohen shumë shpejt.
