Një aeroplan transporti ushtarak sudanez i tipit Ilyushin Il-76 u rrëzua gjatë përpjekjes për të uler në bazën ajrore Osman Digna në Port Sudan më 9 dhjetor, duke shkaktuar vdekjen e të gjithë pasagjerëve në bord.
Dy burime ushtarake konfirmuan incidentin për agjencinë AFP, duke theksuar se avioni pësoi një “defekt teknik” gjatë manovrës për të ateruar.
Përveç faktit që ceku se të gjithë anëtarët e ekuipazhit humbën jetën, nuk u saktësua numri i tyre, as ngarkesa e avionit, pasi ushtria sudaneze nuk ka bërë ende një deklaratë të qartë në lidhje me situatën.
Ilyushin Il-76, një aeroplan transporti ushtarak i prodhuar nga Bashkimi Sovjetik, ka një gjatësi prej 47 metrash dhe një hapje krahësh prej 51 metrash. Ai zakonisht ka një ekuipazh prej pesë personash dhe përdoret nga ushtria sudaneze për transportin e pajisjeve dhe personelit.
Rrëzimi i avionit ndodh në një kontekst të trazuar në Sudan, ku që nga prilli i vitit 2023, vendi është përfshirë nga një luftë civile mes ushtrisë dhe Forcave paraushtarake të Mbështetjes së Shpejtë (RSF).
Ky konflikt ka rezultuar në dhjetëra mijëra të vdekur dhe dymbëdhjetë milionë njerëz të zhvendosur, duke shkaktuar dëme të mëdha në infrastrukturë dhe duke lënë miliona të tjerë në nevojë për ndihmë humanitare.
Situata vazhdon të jetë e tensionuar, me përleshje që ndodhin në fronte të shumta, përderisa vendi i gjerë i Afrikës Lindore përballet me sfida të mëdha për të rimëkëmbur stabilitetin dhe sigurinë.
