Adriatik Lapaj, bashkëkryetar i koalicionit “Nisma–Shqipëria Bëhet”, ka bërë një denoncim publik përmes rrjeteve sociale, ku ka denoncuar një akt frikësimi ndaj kandidates së këtij koalicioni në Durrës, Valbona Myhedin.
Sipas Lapajt, znj. Myhedin është kërcënuar me armë nga persona të dyshuar se kanë lidhje me krimin e organizuar. Ngjarja ka ndodhur gjatë një aktiviteti elektoral në lagjen nr. 8 të qytetit, pranë shkollës “Eftali Koçi”, ku kandidatja po zhvillonte takime me qytetarë dhe po prezantonte programin e saj politik.
Lapaj shton gjithashtu se Valbona Myhedin është shtetase amerikane, dhe për këtë arsye incidenti do t’i raportohet menjëherë Ambasadës së Shteteve të Bashkuara në Tiranë.
Shkrimi i plotë:
Deklaratë Publike
Pak minuta më parë, anëtarë të krimit të organizuar në Durrës kanë kërcënuar me armë kandidaten tonë Valbona Myhedin dhe aktivistët që e shoqëronin, teksa ajo zhvillonte takime me qytetarët në lagjen nr. 8, pranë shkollës “Eftali Koçi”.
Valbona Myhedin, shtetase amerikane, është përballur me një akt burracak frikësimi, që nuk do të kalojë nën heshtje.
I bëjmë thirrje Policisë së Shtetit të veprojë menjëherë, ndërsa do vëmë në dijeni Ambasadën Amerikane.
Ai që i tregoi armën dy grave, do përgjigjet para ligjit!
Rrugëtimi ynë nuk ndalet! 11 maji është afër!
P.s personi në video është ai që ka kryer këtë akt të ulët.
