Prokuroria pranë Gjykatës së Shkallës së Parë të Juridiksionit të Përgjithshëm Durrës ka kërkuar masën “arrest me burg” për pesë zyrtarë të Bashkisë Rrogozhinë, të akuzuar për veprat penale “Shpërdorim detyre”, “Falsifikim” dhe “Mashtrim” me fondet e rindërtimit.
Këta persona i kanë shkaktuar buxhetit të shtetit një dëm prej 353.471.090 lekë.
Gjykata ka miratuar kërkesën e Prokurorisë së Durrësit për arrestimin e shtetasve: M.M. (ish-punonjës i Bashkisë Rrogozhinë), Xh.U. (aktualisht përgjegjëse e zyrës së Rinisë dhe Sportit në Bashkinë Rrogozhinë), B.B. (punonjës në Bashkinë Rrogozhinë), E.L. (ish-punonjës në Bashkinë Rrogozhinë), dhe E.R. (specialiste në zyrën e burimeve njerëzore në Bashkinë Rrogozhinë).
Nga hetimet e prokurorisë ka rezultuar se të akuzuarit kanë kryer veprat e lartpërmendura në të paktën 78 raste. Dokumentet hetimore tregojnë se banesat që kanë përfituar dëmshpërblim për dëmet nga tërmeti nuk kanë qenë për strehim, por janë regjistruar si objekte të tjera në dosjet e tyre, përfshirë edhe kasolle të derrave dhe lopëve.
Gjithashtu, krahas personave të ndaluar, janë në hetim edhe 78 shtetas të tjerë që kanë bashkëpunuar për përfitimin e fondeve të rindërtimit. Këta të fundit përballen me akuzën për veprën penale “Mashtrim”, sipas nenit 143 të Kodit Penal.
