Nëse e ke vënë re që vajzat (dhe djemtë!) me kapele të çuditshme LED ose krehëra futuristikë janë shtuar në TikTok dhe Instagram, mos u çudit: Red Light Therapy (apo “terapia me dritë të kuqe”) po përflitet si shpëtimtari i flokëve të hollë. Por a funksionon vërtet, apo është thjesht një tjetër trend që do zhduket sapo të vijë sezoni tjetër?
Sipas dermatologëve realë, jo vetëm influencerave, terapia me dritë të kuqe nuk është ndonjë magji – por as tallje s’është. Studime serioze nga burime si Vanderbilt University, NIH dhe klinika të specializuara në SHBA tregojnë që përdorimi i valëve të kuqe të dritës mund të:
- Përmirësojë qarkullimin e gjakut në lëkurën e kokës;
- Zgjasë fazën e rritjes së flokut;
- Ulë inflamacionin dhe ndihmojë në “zgjimin” e folikulave që kanë “fjetur” në dimër.
Përkthimi: do shihni flokë më të dendur, më të fortë dhe më të gjallë. Sipas një studimi të vitit 2017, pas 17 javësh përdorimi, pacientët panë 50% më shumë rritje flokësh. Po, 50%.
Po çfarë ndodh në praktikë?
Pajisjet më popullore janë kapelet LED, krehëra me dritë ose edhe pajisje me infra të kuqe që i vendos mbi kokë. Duhet t’i përdorësh 3–5 herë në javë për 10-15 minuta, për disa muaj rresht. Është një proces.
Kush po e bën këtë?
Përveç vajzave nga TikTok, terapia me dritë të kuqe po përqafohet edhe nga emra si Kourtney Kardashian (që ka gjithmonë një pajisje futuristike në dorë), Chrissy Teigen dhe madje disa meshkuj si Joe Jonas dhe David Beckham (shhh, nuk e pranojnë publikisht, por fansat e kanë zbuluar).
A ka ndonjë kleçkë?
Në përgjithësi, është një trajtim shumë i sigurt, por kërkon durim dhe investim. Pajisjet e mira variojnë nga 200€ deri në 1,000€ – por ama janë të certifikuara dhe kanë LED që nuk të djegin kokën. Gjithashtu, nuk do zëvendësojë trajtime të tjera mjekësore nëse ke probleme të theksuara me rënien e flokëve.
Pra, nëse je gati për ta marrë seriozisht rutinën e kujdesit ndaj flokëve, kjo është një mënyrë moderne, pa dhimbje. Bonus? Mund të dukesh si personazh nga “Stranger Things” ndërkohë që i jep shans flokëve të tu të rilindin.
