Mbrojtësi maroken i PSG-së, Achraf Hakimi, ka shprehur bindjen se skuadra e tij është e aftë të përsërisë suksesin historik të sezonit të kaluar, kur parizienët ngritën për herë të parë trofeun e Champions League.
Në një intervistë për faqen zyrtare të klubit, 27-vjeçari tha se mbrojtja e titullit është një sfidë më e madhe sesa ta fitosh për herë të parë, por njëkohësisht edhe një burim i madh motivimi:
“Nuk do ta quaja as të lehtë, as të vështirë. Është një përgjegjësi — ajo që të jep forcën për të mbrojtur titullin, duke ditur se jemi kampionë. Është gjithashtu një sfidë: të tregojmë se ishim kampionë dhe se do të mbetemi të tillë.”
Hakimi shtoi se shumë pak ekipe kanë arritur ta fitojnë kompeticionin në dy sezone radhazi, por PSG-ja e sheh këtë si një motiv shtesë:
“Jo shumë ekipe kanë mundur ta bëjnë këtë. Për ne është një sfidë që na frymëzon dhe na jep forcë, sepse e dimë se rrugëtimi i vitit të kaluar ishte i vështirë. Por nëse punojmë së bashku, mund ta bëjmë sërish.”
Sonte, Paris Saint-Germain pret në “Parc des Princes” skuadrën e Bayern Munich për raundin e katërt të Champions League. Të dy ekipet kryesojnë grupin me nga 9 pikë në tri ndeshje, duke premtuar një përballje spektakolare.
