Në Gent të Belgjikës u dënuan 18 anëtarë të një organizate kriminale ndërkombëtare që trafikonte kokainë nga Kolumbia në portin e Gentit.
Dënimet shkojnë deri në 7 vjet burg, ndërsa të pandehurit janë gjobitur gjithashtu për veprimtarinë e tyre kriminale.
Në qendër të këtij rrjeti qëndronte një degë shqiptaro-marokene, e cila drejtonte operacionet dhe jepte udhëzime për trafikun e drogës.
Kjo strukturë kriminale kishte ndarë përgjegjësitë mes degëve: ajo belge siguronte logjistikën dhe pajisjet për përpunimin e drogës, ndërsa kolumbianët merreshin me prodhimin dhe fshehjen e kokainës në paketime kartoni.
Hetimet nisën dy vite më parë, kur policia belge vuri re një varkë të dyshimtë në Ringvaart të Gentit, e cila kishte qenë pranë një anijeje kolumbiane. Disa javë më vonë, një tjetër varkë u pa në të njëjtin vend dhe një kamera ANPR regjistroi një automjet me persona të njohur për lidhje me trafikun e drogës.
Në nëntor, autoritetet kryen bastisje në disa zona, përfshirë edhe në Bree të Limburgut, ku u zbulua një laborator ku dy shtetas kolumbianë nxirrnin kokainën nga kartoni. “Kokaina ishte e futur në kuti kartoni dhe përdorej si paketim për ngarkesa,” deklaroi Patrick Willocx nga Policia Federale Gjyqësore.
Gjatë bastisjeve, hetuesit sekuestruan substanca kimike, telefona, pasaporta, para të gatshme, orë dhe një kovë me 7 kilogramë kokainë të lagur. Reagimi i shpejtë i policisë erdhi pasi u konstatua se kishte ende shumë kuti kartoni gati për përpunim.
Të gjithë të pandehurit u dënuan për pjesëmarrje në një organizatë kriminale, ndërsa disa prej tyre u shpallën fajtorë për veprimtari logjistike, prodhim droge, kontrabandë, rikuperim, posedim dhe shitje të lëndëve narkotike, përfshirë edhe kanabisin.
