Dy ditë pas shpërthimit me eksploziv në kanalin e ujit të Ibër-Lepencit, kryeministri i Kosovës, Albin Kurti, deklaroi se institucionet dhe ndërmarrjet publike po punojnë me përkushtim për të garantuar furnizimin me energji elektrike dhe ujë për banorët e prekur.
“Institucionet dhe ndërmarrjet publike të Republikës së Kosovës janë duke punuar me dedikim për të garantuar siguri të furnizimit me energji elektrike dhe ujë të pijshëm për të gjithë qytetarët,” shkroi Kurti në Facebook.
Ai ndau një video nga inspektimi i ministres së Ekonomisë, Artane Rizvanolli, e cila shprehu optimizëm për rikthimin e furnizimit me ujë në disa prej komunave.
“Zgjidhja nga inxhinierët e Ibër-Lepencit po funksionon. Aktualisht, rrjedhja e ujit është me kapacitet prej 3 mijë litra në sekondë, e mjaftueshme për të furnizuar KEK. Shpresojmë që së shpejti do të nisë furnizimi me ujë në disa zona,” deklaroi Rizvanolli.
Për momentin, autobotët e ujit janë vendosur në pika kyçe, përfshirë Lagjen e Boshnjakëve në Mitrovicën e Veriut, tri lokacione në Mitrovicën e Jugut, afër Kuvendit Komunal në Zveçan, si dhe në Drenas, Skenderaj dhe Fushë Kosovë.
Në ndihmë të situatës, Shqipëria ka ofruar sasi energjie për Korporatën Energjetike të Kosovës (KEK) që nga dita e djeshme.
Ndërkohë, autoritetet e sigurisë në Kosovë kanë arrestuar tetë persona të dyshuar për përfshirje në sulmin në kanalin e liqenit të Ujmanit. Gjatë operacionit, janë sekuestruar mbi 200 uniforma ushtarake, gjashtë raketahedhës dore, tre granata dore, dy armë automatike AK-47, një revole, municion të kalibrave të ndryshëm, helmeta ushtarake, maska dhe thika. Të dyshuarit akuzohen për përfshirje në veprime kriminale dhe terroriste.
