Gjithsej 10 persona janë arrestuar dhe 123 të tjerë janë proceduar në kuadër të operacionit “Hapësirat publike”, i zhvilluar nga Policia e Shtetit për të luftuar zaptimin e hapësirave publike, të cilat ishin shfrytëzuar ilegalisht për parkingje dhe lavazhe.
Ky aksion ka goditur 133 raste në të gjithë vendin, me 78 raste në Tiranë (10 të arrestuar dhe 68 të proceduar), 16 në Shkodër, 11 në Lezhë, 6 në Korçë, 6 në Fier e Lushnjë, 4 në Vlorë e Sarandë, 4 në Dibër, 3 në Elbasan, 2 në Berat dhe 2 në Durrës. Në Gjirokastër është evidentuar 1 rast.
Policia ka bërë të ditur se një pjesë e madhe e këtyre aktiviteteve ekonomike ishin të paregjistruara dhe po i jepnin fitime të fshehura operatorëve që nuk lëshonin kuponë tatimorë. Gjithashtu, janë evidentuar 45 drejtues automjetesh të proceduar penal për parkime të gabuara, që pengonin lëvizjen e lirë të mjeteve dhe qytetarëve.
Operacioni “Hapësirat publike” ka përfshirë strukturat për Hetimin e Krimeve Ekonomiko-Financiare dhe Policitë Bashkiake, me qëllim lirimin e hapësirave publike dhe ndëshkimin e atyre që i zaptuan. Aksioni ka si objektiv të rrisë kontrollin dhe ndëshkimin për parkimet që ndalojnë qarkullimin normal të mjeteve dhe automjeteve të emergjencës.
Policia e Shtetit apelon për qytetarët që të respektojnë ligjin dhe të mos cënojnë të drejtën e të tjerëve për të shfrytëzuar hapësirat publike, duke theksuar se çdo aktivitet që bie ndesh me ligjin do të dënohet. Aksioni do të vijojë në mënyrë intensive në të gjitha qarqet e vendit dhe policia inkurajon qytetarët të denoncojnë çdo rast paligjshmërie për të kontribuar në garantimin e rendit dhe sigurisë publike.
