Mesfushori brazilian i West Ham, Lucas Paquetá, është shpallur fajtor për dy shkelje të rregullave të Federatës Angleze të Futbollit (FA), por ka shmangur një gjobë financiare. FA ka njoftuar se lojtari është sanksionuar për mosbashkëpunim gjatë hetimeve, duke dështuar të përgjigjej në pyetje dhe të siguronte informacionin e kërkuar.
Pas një seance dëgjimore, një komision i pavarur ka konstatuar se të dy shkeljet e nenit F3 të rregullores së FA-së ishin të provuara. Megjithëse Paquetá i mohoi akuzat, ai është ndëshkuar me një vërejtje zyrtare dhe një paralajmërim për sjelljen e ardhshme, pa u gjobitur financiarisht. Ai do të përballojë vetëm 10% të shpenzimeve të procesit, ndërsa pjesa tjetër do të mbulohet nga FA.
Në vendimin e komisionit janë marrë parasysh disa faktorë lehtësues, përfshirë bashkëpunimin e mëvonshëm të lojtarit, dorëzimin e pajisjeve të tij celulare dhe dhënien e një dëshmie për marrëdhëniet e tij me persona të përfshirë në bastet sportive. Paquetá kishte shpëtuar më parë nga një ndalim të përjetshëm pas akuzave të manipulimit të ndeshjeve, të cilat komisioni i shpalli të paprovuara. Avokati i tij, Alastair Campbell, e përshkroi vendimin si fundin e një periudhe të vështirë për Paquetá, duke theksuar se ky zhvillim është një hap pozitiv për të pastruar emrin e tij.
Ndërkohë, mesfushori 28-vjeçar po përjeton një fillim të ngadaltë sezoni me West Ham, klubi i të cilit ndodhet aktualisht në zonën e rrezikut për rënie nga Premier League. Raportohet se Paquetá dëshiron të largohet nga klubi gjatë merkatos së janarit, dhe “Çekanët” janë të gatshëm ta shesin nëse arrin një ofertë rreth 60 milionë paund. Këto zhvillime kanë ngjallur interes jo vetëm për lojtarin, por edhe për të ardhmen e skuadrës në kampionat.
