Pas publikimit të lajmit për një 13-vjeçar nga Zelanda e Re, i cili përjetoi probleme serioze shëndetësore pasi gëlltiti dhjetëra magnetë të fuqishëm, ka ardhur një reagim zyrtar nga platforma TEMU për median ilirianews.al, ku pretendohet se magnetët janë blerë.
Në një deklaratë për mediat, përfaqësuesit e TEMU në Shqipëri sqarojnë se kompania ka kontaktuar New Zealand Medical Journal për të mësuar më shumë mbi rastin në fjalë. Sipas tyre, adoleshenti ka raportuar se magnetët janë blerë nga platforma Temu, por kjo nuk është verifikuar ende në mënyrë të pavarur.
“Pas publikimit të raportit, TEMU ka kontaktuar New Zealand Medical Journal për të mësuar më shumë rreth rastit në fjalë. Sipas redaktorëve, adoleshenti 13-vjeçar ka raportuar se magnetët janë blerë nga Temu, por ne nuk kemi qenë në gjendje ta verifikojmë këtë në mënyrë të pavarur,” – thuhet në reagim.
Kompania bën të ditur se ka rishikuar fotografinë e magnetëve të publikuar në revistë dhe ka kontrolluar listimet e produkteve të ngjashme në platformën e saj. Sipas TEMU, magnetët që aktualisht shiten në platformë janë në përputhje me rregulloret e Zelandës së Re, dhe produkte të ngjashme tregtohen gjithashtu nga shitës të tjerë online dhe fizikë.
“Edhe pse këto produkte janë të ligjshme për tregtim, ato mund të jenë të rrezikshme nëse gëlltiten, dhe ne mbështesim çdo përpjekje për të rritur ndërgjegjësimin publik për sigurinë e magnetëve,” – shton kompania.
TEMU thekson se si treg për palët e treta, kërkon që të gjithë shitësit në platformë të veprojnë në përputhje me ligjet dhe standardet e sigurisë në fuqi, duke ndërmarrë masa të menjëhershme për të hequr çdo listim që nuk i përmbush këto standarde.
Në fund të reagimit, kompania kërkon që mediat të përfshijnë versionin e saj zyrtar në artikujt e publikuar, ose të marrin në konsideratë fshirjen e tyre për të shmangur keqkuptime mbi situatën.
