Pas një tjetër humbjeje zhgënjyese — 3-0 ndaj Crystal Palace në Kupën Carabao — trajneri i Liverpool-it, Arne Slot, është vënë nën presion të madh dhe i ka dhënë përgjigje të sinqerta për të ardhmen e tij.
Holandezi pranoi se forma aktuale e skuadrës “nuk është aspak e mirë”, por theksoi se nuk ndien frikë për shkarkim, pavarësisht kritikave:
“Kur je te Liverpool, presioni është gjithmonë aty. Nuk mendoj se kjo humbje e ka ndryshuar shumë situatën,” – u shpreh Slot pas ndeshjes në “Anfield”.
Skuadra e tij ka pësuar gjashtë humbje në shtatë ndeshjet e fundit, me mungesat dhe kalendari i ngjeshur që, sipas tij, kanë ndikuar ndjeshëm:
“Kemi vetëm 15-16 lojtarë të gatshëm. Luajmë çdo dy ditë, dhe disa s’kanë bërë as përgatitje verore. Nuk janë justifikime, por kjo situatë e vështirë shpjegon disa rezultate.”
Slot mbrojti gjithashtu zgjedhjen për të aktivizuar lojtarë të rinj në ndeshjen ndaj Palace, duke kujtuar se ky është një qëndrim tradicional i klubit në këtë kompeticion.
Liverpool aktualisht renditet i shtati në Premier League, shtatë pikë pas Arsenalit, dhe përballet këtë fundjavë me Aston Villën, përpara se të sfidojë Real Madridin në Champions League.
