Edhe këtë mëngjes, qarku i Kukësit u përball me mot të keq, i shoqëruar nga reshje shiu të lëndshëm dhe erëra të forta. Si pasojë, disa akse rrugore në këtë zonë përjetuan rrëshqitje dherash dhe rënie gurësh. Informacionet e para tregojnë se disa rrugë rurale në fshatrat Lojme, Bele, Cërnalevë, Oreshkë, Zapot, Orgjost, dhe Nimçë kanë pësuar dëmtime të konsiderueshme për shkak të shembjeve të dherave.
Në akset kombëtare, si Kukës–Bushticë, Kukës–Shishtavec, dhe Kukës–Qafë Mali, ka pasur prezencë të gurëve të rënë, që ka penguar qarkullimin. Disa fshatra të thella në Kukës vazhdojnë të kenë probleme me furnizimin me energji elektrike. Ndërsa, reshjet e shiut kanë sjellë një përmirësim të ndjeshëm të situatës hidrike në Liqenin e Kukësit, me rritje të prurjeve në lumenjtë Drini i Zi, Drini i Bardhë dhe Luma. Rrënojat e Kukësit të Vjetër sot janë mbuluar nga uji, duke treguar një rritje të nivelit të ujit me disa metra në ditë. Kjo situatë po i jep një frymëmarrje të re prodhimit të energjisë elektrike në vend, pas një periudhe të gjatë thatësire.
Probleme nga reshjet janë raportuar gjithashtu në Bulqizë, ku uji ka dalë nga shtrati i Zallit të Thatë dhe ka përmbytur rrugën që lidh fshatrat Kokërdhak dhe Koçaj në njësinë Fushë Bulqizë. Banorët e zonës tregojnë se janë bllokuar për rreth tri orë, ndërsa shprehin shqetësimin për përsëritjen e këtyre situatave.
Thirrjet për ndihmën e autoriteteve dhe për marrjen e masave për të parandaluar përmbytjet e ardhshme janë të shumta. Kjo situatë shkakton panik dhe shqetësim, duke e bërë të domosdoshme që autoritetet lokale të veprojnë me urgjencë për të mbrojtur banorët dhe infrastrukturën.
