Në datën 26 tetor, në ora 10:00, Kuvendi i Kosovës do të zhvillojë një seancë për formimin e një qeverie të re, me Albin Kurtin nga Lëvizja Vetëvendosje që ka marrë mandatin nga presidentja, Vjosa Osmani.
Kurti do të paraqesë programin dhe përbërjen e ekzekutivit, por derimë tani nuk ka ndodhur ndonjë marrëveshje me partitë e tjera për të siguruar 61 votat e nevojshme.
Kryetari i Partisë Demokratike të Kosovës (PDK), Memli Krasniqi, ka theksuar se partia e tij nuk do të bisedojë për asnjë opsion qeveritar me Kurtin.
Po ashtu, Lidhja Demokratike e Kosovës (LDK) ka konfirmuar se ka dallime thelbësore me Lëvizjen Vetëvendosje dhe nuk do të bashkëpunojë.
Ramush Haradinaj, kryetar i Aleancës për Ardhmërinë e Kosovës, preferon një qeveri opozitare dhe ka shprehur mospëlqim për bashkëpunimin me Kurtin.
Edhe Fatmir Limaj, kryetar i NISMA-s, ka deklaruar se nuk do të mbështesë qeverinë me Kurtin në krye.
Aktualisht, Albin Kurti ka vetëm 56 vota, përfshirë 48 nga partia e tij dhe 8 nga minoritetet joserbe, që do të thotë se i nevojiten edhe 5 vota të tjera për formimin e qeverisë.
Në rast se ai dështon të sigurojë shumicën e nevojshme, një shumicë e dytë parlamentare do të ketë një periudhë prej 10 ditësh për të provuar të formojë qeverinë.
Megjithatë, PDK ka bërë të ditur se nuk do të kërkojë një mandat të dytë nga presidentja, duke e hapur rrugën për zgjedhje të jashtëzakonshme, siç parashikohet nga Kushtetuta e Kosovës.
