Në zemër të Manhatanit, një prej simboleve të reja të horizontit të Nju Jorkut po përballet me një krizë të papritur. Grataçela 432 Park Avenue, e përfunduar në vitin 2016 dhe e njohur si ndërtesa që hapi epokën e kullave tepër të larta dhe të holla, rrezikon të shembet.
Sipas hetimeve të New York Times, inxhinierë të pavarur kanë zbuluar qindra çarje dhe mungesa betoni në strukturën mbajtëse të godinës 96-katëshe, 426 metra të lartë.
Ekspertët fajësojnë erën, ujin dhe mbi të gjitha arrogancën e ndërtuesit Harry Macklowe dhe arkitektit Rafael Viñoly, të cilët, në ndjekje të një dizajni estetikisht mahnitës, kanë anashkaluar nevojat strukturore të sigurisë.
“Një ndërtesë dhjetëvjeçare nuk duhet të shfaqë këtë nivel dëmtimi,” deklaroi për NYT profesori i inxhinierisë strukturore Jose Torero nga University College London, duke shtuar se çdo aspekt i 432 Park, nga pamja e jashtme te lartësia dhe hollësia, “është shtyrë deri në kufi ekstrem.”
Me 125 apartamente që kushtojnë dhjetëra miliona dollarë dhe që kanë pasur si banorë yje si Jennifer Lopez, Alex Rodriguez dhe magnatin saudit Fawaz Alhokair, ndërtesa ikonike e “Billionaire’s Row” mund të përballet me një të ardhme të pasigurt.
Pa një rikualifikim që kushton qindra milionë dollarë, ajo rrezikon të bëhet e pabanueshme dhe madje të përbëjë rrezik për kalimtarët, për shkak të mundësisë së shkëputjes së fragmenteve nga lart.
Ndërkohë, ndërtuesit këmbëngulin se struktura është e sigurt, por raportet flasin për probleme të përsëritura si ashensorë që bllokohen, lëkundje të tepruara nga era dhe infiltrime uji, ndërsa mosmarrëveshjet ligjore mes banorëve dhe ndërtuesve po vonojnë ndërhyrjet e domosdoshme.
