Për shkak të përkeqësimit të kushteve atmosferike, Kapiteneria e Portit të Vlorës ka urdhëruar këtë të premte pezullimin e lundrimit të anijeve të vogla të peshkimit.
Ndalimi hyn në fuqi prej orës 09:00, për shkak të erës së fortë me drejtim jug-juglindje, me forcë deri në 6-7 ballë dhe shpejtësi ere 15-20 m/s, ndërsa dallgët arrijnë lartësinë 1.5 deri në 2.5 metra.
Për të shmangur çdo situatë të rrezikshme, është ndaluar pajisja me leje e mjeteve të vogla lundruese dhe të peshkimit që operojnë në det të hapur, brenda dhe jashtë gjirit të Vlorës.
Ndërkohë, anijet e transportit ndërkombëtar detar do të vazhdojnë të operojnë normalisht sipas destinacioneve të tyre.
Sipas njoftimit të Kapitenerisë, përmirësimi i situatës hidrometeorologjike për mjetet e vogla pritet pas orës 06:00 të datës 18 tetor 2025.
