Dy burra të dënuar me vdekje për vrasje u ekzekutuan në Florida dhe Missouri mëngjesin e së martës, duke e çuar numrin total të ekzekutimeve në Shtetet e Bashkuara për këtë vit në 37, më i larti që nga viti 2013. Ekzekutimi i fundit në Florida iu dha 72-vjeçarit Samuel Smithers, i cili kishte vrarë dy prostituta, Christy Cowan dhe Denise Roach, në vitin 1996. Smithers u akuzua për goditjen dhe mbytjen e viktimave, trupat e të cilave u gjetën në një pronë ku ai punonte si kopshtar.
Në Missouri, Lance Shockley, 48 vjeç, u ekzekutua për vrasjen e oficerit të policisë, Carl Graham, në vitin 2005. Ai insistoi se ishte i pafajshëm deri në fund. Vrasja e oficerit, i cili po hetonte një aksident fatal trafiku të lidhur me Shockley një vit më parë, u krye me armë zjarri. Mbrojtja e tij nënvizoi se dënimi erdhi edhe pa prova të forta dhe se juria nuk arriti në një vendim unanim. Megjithatë, Missouri është një nga shtetet ku dënimi me vdekje mund të vendoset pa një vendim unanim, një praktikë e kontestuar.
Që nga fillimi i vitit, shumica dërrmuese e ekzekutimeve, 31 në total, janë kryer me injeksion vdekjeprurës, ndërsa katër të tjera janë realizuar përmes asfiksisë me azot, një metodë e diskutueshme që konsiderohet nga ekspertët e OKB-së si torturë. Kjo metodë u përdor për herë të parë në Alabama në vitin 2004. Po ashtu, dy ekzekutime të tjera u kryen me skuadrat e pushkatimit në Karolinën e Jugut, metodë që nuk ishte përdorur në SHBA që nga viti 2010.
Aktualisht, dënimi me vdekje është hequr në 23 nga 50 shtetet amerikane, ndërsa tre të tjera, Kalifornia, Oregoni, dhe Pensilvania, po zbatojnë një moratorium për zbatimin e tij, në përputhje me vendimet e guvernatorëve të tyre. Ekzekutimet e fundit ndodhin në një kontekst të debativ rreth dënimit me vdekje në Shtetet e Bashkuara, duke ringjallur diskutime mbi etikën dhe efektivitetin e kësaj forme të ndëshkimit.
