Në një nga momentet më të vështira të karrierës së tij si trajner, Pep Guardiola po përballet me një sfidë të paprecedentë: rikthimin e Manchester City nga një krizë që shënoi humbjen e tyre të pestë radhazi. Kampionët në fuqi të Premier League u mposhtën 4-0 nga Tottenham Hotspur në Etihad Stadium, duke regjistruar një seri statistikash negative që nuk ishin parë prej dekadash.
Kjo është hera e parë që një kampion në fuqi i Anglisë humbet pesë ndeshje radhazi që nga viti 1956. Gjithashtu, është hera e parë që City humb pesë herë radhazi në të gjitha kompeticionet që nga viti 2006. Për Guardiola, humbja me katër gola në shtëpi ishte një tjetër rekord i hidhur – diçka që nuk kishte ndodhur kurrë gjatë karrierës së tij 17-vjeçare si trajner.
Humbja e fundit nuk ishte një rastësi. Me 14 gola të pësuar në pesë ndeshjet e fundit, City duket se ka humbur jo vetëm këmbët, por edhe uriën për sukses. Guardiola, i cili pas ndeshjes theksoi mungesat e disa lojtarëve kyç si Rodri, Ruben Dias dhe Mateo Kovacic, pa se edhe lojtarët me përvojë të skuadrës dështuan të tregojnë atë cilësi që i solli sukses në vitet e kaluara.
Në anën tjetër, Tottenham luajti pa dy mbrojtësit e saj kryesorë, Micky van de Ven dhe Christian Romero, por përsëri shkatërroi City-n me lehtësi. Analisti Gary Neville e përshkroi situatën si “shqetësuese”, duke theksuar mungesën e efikasitetit të City-t kundër një mbrojtjeje të përbërë nga Ben Davies dhe Radu Dragusin.
Sfida më e madhe e Guardiola-s?
Rivalët mund të ndihen të kënaqur me krizën e City-t. Trajneri i Manchester United, Ruben Amorim, së fundmi deklaroi se rinovimi i kontratës së Guardiola-s ishte “një problem për të gjithë të tjerët”. Por, me performanca të tilla, shtyrja e qëndrimit të katalanasit mund të shihet si një arsye për gëzim për kundërshtarët e Premier League.
Pep Guardiola ka përpara sfidën më të madhe të karrierës së tij: të ringrejë një skuadër që duket e rraskapitur fizikisht dhe mendërisht, në një kohë kur presioni është më i madh se kurrë. Ndërsa kampionati vazhdon, mbetet për t’u parë nëse Guardiola do të mund të rikthejë lavdinë e City-t, apo nëse kjo do të shënojë fillimin e fundit të epokës së tij në Etihad.
