Komuniteti Mysliman i Shqipërisë (KMSH) ka reaguar ashpër ndaj nisjes së ndërtimit të kullës “Rozafa Tower” mbi një pronë vakëf në Shkodër, duke e cilësuar këtë veprim si shkelje të hapur të ligjit dhe cenim të së drejtës së pronësisë.
Në deklaratën e saj, KMSH shprehet e indinjuar që ndërtimi po zhvillohet pavarësisht vendimeve përfundimtare të gjykatave, të cilat njohin pronësinë e truallit në favor të Komunitetit Mysliman, Kishës Orthodhokse dhe familjes Laçej.
Sipas KMSH, disa institucione shtetërore nuk kanë zbatuar detyrimet ligjore, duke lejuar ndërtime të paligjshme dhe shpërfillur aktet gjyqësore.
KMSH kërkon ndërhyrjen e menjëhershme të autoriteteve për ndalimin e punimeve dhe hetimin e zyrtarëve përgjegjës, duke paralajmëruar se, nëse kjo e drejtë vijon të cenohet, çështja do të dërgohet në Gjykatën Evropiane të të Drejtave të Njeriut në Strasburg.
