Qytetarët zhvilluan më 21 nëntor një protestë para ministrisë së Arsimit, pas vrasjes së Martin Canit, nga bashkëmoshatari i tij, Mario Përlleshi, para ambienteve të shkollës “Fan Noli”.
Ngjarja e rëndë ndodhi më 18 nëntor, ndërsa qytetarët dhe prindërit kërkuan dorëheqjen e ministres së Arsimit, Ogerta Manastirliu, gjatë protestës.
Në mbyllje të protestës qytetarët lajmëruan se protesta e radhës do të mbahte më 25 nëntor, të hënën, përpara ministrisë.
Organizatorët e protestës thanë se do protestojnë deri në përmbushjen e kërkesave të tyre, mes tyre ajo për dorëheqjen e ministres Ogerta Manastirliu.
Një nga organizatorët e protestës, Migen Qiraxhi njoftoi se protesta e së hënës do të mbahet në orën 17:00, teksa shtoi se nëse kërkesat e tyre nuk do të plotësohen s’do të largohen nga sheshi dhe madje do ta konsiderojnë dhe bojkotin e mësimit.
Qiraxhi: Nuk do të largohemi nga sheshi derisa kërkesat të plotësohen. Nëse ministria dhe qeveria vijon me të njëjtat neglizhime dhe arrogancë do të konsiderojmë dhe bojkotin e mësimit si formë të reagimit tonë. Ndaj ju bëjmë thirrje të gjithëve që t’i bashkohen protestës së ditës së hënë.
