Ministri i Drejtësisë, Besfort Lamallari, ka folur sot në kuvend për vrasjen e gjyqtarit të Apelit të Tiranës, Astrit Kalaja, duke hedhur fajin mbi opozitën dhe retorikën e saj ndaj gjyqtarëve.
Lamallari u shpreh se po bëhet politikë me vrasjen e gjyqtarit, duke shtuar se opozita ka ngjallur gjuhë urrejtje ndaj magjistratëve.
“Të bësh politikë me vrasjen dhe me një rast tragjik dhe të bësh retorikë, politikisht mbi një vrasje është e rëndë, akoma nuk janë bërë të 7-tat. Keni përgjegjësi për gjithë gjuhën denigruese që keni përdorur nga daljet në ballkon, që keni sharë e telendisur SPAK e SKRAP, çdo të hënë, nga Altin Dumani, Altin Troplini, këto janë akuzat dhe gjuhet e urrejtjes që keni ngjallur ndaj gjyqësorit. Keni ndërsyer militantët, mos bëj zhurmë, unë flas këtu si përfaqësues i institucioneve të drejtësisë. Nuk e keni lënë prokuror, keni anatemuar parterët startegjikë, ambasadorin e SHBA, Unionit, vetëm se mbështetën reformën në drejtësi dhe keni gojë të flisni. Ca është kjo, s’keni turp, prandaj u kanë lënë shqiptarët aty ku ui kanë lënë”, tha Lamallari.
Ndërkohë, sipas hetimeve dhe dëshmive të autorit, ngjarja e rëndë ka ndodhur pas një procesi gjyqësor për pronësinë e një pallati në Shkodër, që kishte zgjatur shumë dhe kishte shkaktuar pakënaqësi tek pala e përfaqësuar nga autorët.
Pas shpalljes së vendimit kundër tyre, Elvis Shkambi, 30 vjeç, nxori armën dhe qëlloi tri herë, duke lënë të vdekur gjyqtarin Kalaja. Në të njëjtën ngjarje u plagosën edhe Rakip dhe Ervis Kurtaj, babë e bir, pjesë e palës tjetër në proces, të cilët ndodhen jashtë rrezikut për jetën.
