Kandidati demokrat për kreun e Bashkisë New York, Zohran Mamdani, është takuar me përfaqësues të komunitetit shqiptar mysliman në Staten Island, një nga grupet më aktive dhe të përkushtuara ndaj zhvillimit ekonomik dhe jetës shoqërore në qytet.
Në një postim në rrjetet sociale, Mamdani vlerësoi kontributin e këtij komuniteti, duke e cilësuar atë si “një forcë të vërtetë për sipërmarrje dhe shërbim publik”.
“Jam mirënjohës që pata mundësinë të takoj liderët vendorë për të diskutuar mënyrat se si administrata ime planifikon të mbështesë bizneset e vogla dhe të sigurojë që çdo komunitet të ketë një vend real në tryezë”, shkroi Mamdani.
Gjatë takimit, janë diskutuar sfidat me të cilat përballen sipërmarrjet e vogla, roli i komuniteteve në nxitjen e zhvillimit ekonomik vendor, si dhe rritja e përfaqësimit të komuniteteve emigrante në proceset vendimmarrëse të qytetit.
Komuniteti shqiptar në Staten Island njihet për aktivitetin e tij të gjerë në fusha të ndryshme, nga tregtia dhe gastronomia, te kontributi në jetën shoqërore e kulturore. Gjatë viteve, ai ka krijuar një rrjet të fortë solidariteti dhe bashkëpunimi, duke u bërë një shembull i integrimit të suksesshëm në qytetin e New York-ut.
Ky takim u pa si një shenjë vlerësimi për rolin e komuniteteve shqiptare në diasporë, si dhe një angazhim për ta bërë pjesë të proceseve të politikave publike në nivel lokal dhe shtetëror.
“Vetëm kur çdo zë dëgjohet, mund të ndërtojmë një qytet më të drejtë dhe më të përfshirës”, përfundoi Mamdani në mesazhin e tij.
