Bashkimi Evropian do të zëvendësojë vulat tradicionale të pasaportave me një sistem të ri dixhital kufitar, që do të regjistrojë automatikisht hyrjet dhe daljet e udhëtarëve nga vendet e zonës Shengen.
Sipas njoftimit zyrtar të BE-së, nga e diela, 12 tetor 2025, do të nisë zbatimi i Sistemit të ri biometrik të Hyrje/Daljeve (EES), i cili do të përdoret nga shtetasit që nuk janë pjesë e Bashkimit Evropian. Ky sistem do të funksionojë në 29 vende evropiane, përfshirë 25 vende anëtare të BE-së dhe shtete si Zvicra, Norvegjia, Lihtenshtajni dhe Islanda.
Në vend të vulave të pasaportës, udhëtarëve do t’u regjistrohen të dhëna biometrike, si fytyra, gjurmët e gishtërinjve dhe datat e hyrjes e daljes. Qëllimi, sipas BE-së, është shpejtimi i kontrolleve kufitare dhe forcimi i sigurisë, duke parandaluar imigracionin e paligjshëm.
Sistemi do të aplikohet për udhëtime afatshkurtra deri në 90 ditë brenda çdo periudhe 180-ditore dhe është falas për të gjithë përdoruesit. Të dhënat personale do të ruhen për tre vjet, për të lehtësuar rihyrjen në zonën Shengen pa pasur nevojë për regjistrim të ri.
Autoritetet evropiane paralajmërojnë se në javët e para mund të ketë vonesa në pikat kufitare, për shkak të regjistrimit fillestar të udhëtarëve.
