Një 65-vjeçar ka rënë në prangat e Policisë së Tiranës, pak minuta pasi kishte vjedhur çantën e një klienti në një lokal në rrugën “Mihal Duri”.
Sipas njoftimit zyrtar, menjëherë pas marrjes së kallëzimit nga shtetasi që denoncoi vjedhjen, shërbimet e Komisariatit të Policisë Nr. 3 organizuan punën dhe identifikuan autorin e dyshuar, shtetasin A. G., 65 vjeç.
Gjatë kontrollit, efektivët gjetën të fshehur në një rrugicë pranë Rrugës së Durrësit çantën e vjedhur, e cila përmbante një shumë të konsiderueshme eurosh. Ajo u sekuestrua në cilësinë e provës materiale.
Policia njofton se po vijon puna për të zbardhur nëse 65-vjeçari është i përfshirë edhe në raste të tjera vjedhjesh.
Materialet procedurale i janë referuar Prokurorisë për veprime të mëtejshme.
