UEFA po përgatit masa ndaj federatës izraelite të futbollit, por sipas burimeve, ndalimi do të vlejë vetëm për garat që ajo vetë organizon, si Nations League dhe Europa League. Kjo do të thotë se Izraeli nuk do të përjashtohet nga kualifikueset e Kupës së Botës 2026, pasi ato janë kompeticion i FIFA-s.
UEFA nuk pritet të ndërmarrë një hap të njëanshëm për të bllokuar pjesëmarrjen e Izraelit në kualifikueset e Botërorit, për shkak të ndërlikimeve politike. Një veprim i tillë do ta vendoste FIFA-n nën presion të madh, veçanërisht pasi SHBA – bashkëorganizatore e Kupës së Botës 2026 – ka paralajmëruar se do të kundërshtojë çdo përpjekje për ta përjashtuar Izraelin.
Ndërkohë, tensionet po rriten edhe në vendet kundërshtare të Izraelit në grup. Norvegjia dhe Italia do të përballen me të javën e ardhshme. Amnesty International në Norvegji ka kërkuar më shumë presion ndaj UEFA-s, ndërsa në Itali u mbajt një grevë e përgjithshme 24-orëshe në shenjë proteste për veprimet e Izraelit në Gaza.
Presidenti i Federatës Italiane, Gabriele Gravina, e ka përjashtuar idenë e bojkotit, duke theksuar se kjo do ta favorizonte Izraelin në rrugëtimin e tij drejt Botërorit. Aktualisht, Izraeli renditet i treti në grupin kualifikues, me pikë të barabarta me Italinë e vendit të dytë, por me një ndeshje më shumë të luajtur.
