Tirane- Në një letër të hapur, të lexuar nga Sekretari i Përgjithshëm Tedi Blushi, në emër të Ilir Metës, kreu i Partisë së Lirisë kërkon nga burgu nisjen e protestave para Prokurorisë së Posaçme.
Meta i shkruan mbështetësve të tij se protesta duhet të jenë periodike, kundër arrestimit të tij dhe për të denoncuar aferat, që sipas Metës, SPAK i amniston.
“Organizoni protesta periodike paqësore kundër SPAK, denonconi aferat korruptive që SPAK po i amniston. Çmontoni këtë organizatë që i shërben narkoregjimit”, shkruhet ndër të tjera në letrën e tij, që e lexoi sot (20 Nëntor) në mbledhjen e Kryesisë, Sekretari i Përgjithshëm, Tendi Blushi.
Pasi lexoi letrën, Blushi u shpreh se “sot do marrim vendimin për të organizuar protestën e radhës para organizatës së SPAK”, si dhe “luftës ballore me këtë narkoshtet dhe narkoregjim”.
Pjesë nga letra e Ilir Metës:
“Kamikazët skapistë kishin frikë se mos prishja provat, por e vëfrteta ishte se unë nuk kisha gjë në dorë për të prishur provat. Edhe një nga fansat më të mëdhenj të SPAK dikur, Baton Haxhiu, u shpreh publikisht se ishte i shokuar nga mediokriteti profesional i skapistëve, në respektimin e fakteve dhe provave.
S’kam asnjë pozitë të prish prova, se s’jam as kryeministër, as ministër, as kryeparlamentar apo anëtar i qeverisë. E vërteta është se SPAK jo vetëm fsheh provat dhe faktet, por intimidon dëshmitarët dhe një pjesë të tyre i ka marrë peng për shkak të problemeve që ata kanë pasur në të kaluarën.
Tani që afrohen edhe zgjedhjet e ardhshme parlamentare, SPAK ka marrë vendim të arrestojë kryetarin e PL për t’i shërbyer kryeministrit Edi Rama, sepse po të ishte i lirë Meta, do çmontonte të gjithë skapistët publikisht, por edhe do fuqizonte partinë e lirisë dhe opozitën.
Shumëfishoni angazhimin tuaj në terren për t’i dhënë goditje narkoregjimit, narkodrejtësisë dhe skapistëve të kapur nga regjimi. Kërkoj nga ju që në përgjigje ndaj sjelljes armiqësore ndaj PL dhe meje të organizoni protesta paqësore ndaj SPAK-ut, për të denoncuar të gjitha aferat skandaloze të Ramës, por edhe veprimet e SPAK. Jo vetëm që SPAK-u s’i dënon, por merret me disa bedela, që Ramës s’i interesojnë. Punoni për 5 prioritetet dhe planin 4 mln shqiptarë. Ne do ta fitojmë këtë betejë për hir të ekzistencës së kombit tonë. Kur të flasim për këtë kohë, do themi në kohën e sorosianëve dhe mcgonigalëve, ose në kohën e kolerës”.
