Berlin, 27 shtator 2025 – Dhjetëra mijëra njerëz marshuan në kryeqytetin gjerman në një nga protestat më të mëdha deri tani kundër ofensivës izraelite në Gaza.
Turmat mbanin flamuj palestinezë dhe pankarta me mbishkrime si “Free Palestine” dhe “Ushqimi dhe uji janë të drejta njerëzore”, duke nisur marshimin nga Bashkia e Berlinit drejt Monumentit të Shtyllës së Fitores, ku u zhvillua një koncert me reperë dhe artistë hip hop.
Sipas policisë, në demonstratë morën pjesë rreth 60,000 persona, ndërsa organizatorët pretendojnë se numri i protestuesve arriti në 100,000. Për sigurinë u angazhuan rreth 1,800 forca policie. Ngjarja përfundoi e qetë pas orës 20:00 sipas orës lokale.
Protesta u organizua nga partia Die Linke dhe grupe të shoqërisë civile, të cilët akuzuan qeverinë gjermane për heshtje ndaj krizës humanitare në Gaza. Ata kërkuan që Berlini të ushtrojë më shumë presion ndaj Izraelit për të ndryshuar kursin.
Demonstrata tregon zemërimin në rritje dhe ndryshimin e klimës publike në Gjermani. Historikisht, Izraeli ka gëzuar mbështetje të gjerë në Berlin, por ndërsa ofensiva vazhdon, zemërimi ndërkombëtar po thellohet.
Kancelari Friedrich Merz kishte njoftuar në gusht kufizime në shitjet e armëve për Izraelin, por kritikët e konsiderojnë këtë hap të pamjaftueshëm, pasi Gjermania ende nuk ka vendosur sanksione ndaj Tel Avivit dhe nuk është e gatshme të njohë një shtet palestinez, ndryshe nga shumë vende perëndimore.
Sipas autoriteteve shëndetësore në Gaza, ofensiva izraelite që nisi pas sulmit të Hamasit më 7 tetor 2023 ka shkaktuar mbi 65,926 viktima palestineze, kryesisht civilë – shifra që Kombet e Bashkuara i konsiderojnë të besueshme.
