Policia e Tiranës ka goditur një grup të organizuar që merrej me trafikimin dhe shpërndarjen e lëndëve narkotike në kryeqytet. Pesë persona janë arrestuar, ndërsa gjatë operacionit në zonën e Tufinës u sekuestruan doza kokaine dhe materiale të tjera prove.
Sipas hetimeve, Xhoi Zina dhe Anxhelina Koçi, një çift i fejuar, dyshohet se kanë transportuar drogë me një mjet tip Toyota Yaris nga Sukthi në drejtim të Tiranës. Lënda narkotike është fshehur në një magazinë në pronësi të Redion Kuqit, e cila ndodhet pranë Tufinës.
Në këtë veprimtari kriminale ka qenë i përfshirë edhe Erdi Gjiriti, i cili shërbente si roje e magazinës për të mbrojtur “mallin” dhe shoqëronte çiftin gjatë transportit të drogës nga Sukthi.
Gjatë ndërhyrjes së forcave të Komisariatit Nr. 4, në magazinë është gjetur edhe Ardit Çitaku, i cili u kap me doza të gatshme kokaine, të cilat iu sekuestruan nga policia.
Të pesë të arrestuarit kanë pranuar akuzat dhe kanë zbuluar skemën që kishin ndërtuar. Sipas grupit hetimor, ata dyshohen se kanë ushtruar këtë aktivitet kriminal për të paktën një vit, duke marrë drogën nga një grup i strukturuar në Sukth, për ta sjellë në Tiranë, ku më pas e ndanin në doza të vogla për shpërndarje.
Hetimet vijojnë për identifikimin e të tjerë personave të përfshirë në këtë rrjet, si dhe të burimit kryesor të furnizimit me lëndë narkotike.
