Aktorja e njohur Angelina Jolie ka dhënë një koment të sinqertë mbi gjendjen aktuale të lirisë së shprehjes në Shtetet e Bashkuara, duke theksuar shqetësimin e saj për situatën e tanishme, shkruan HuffPost.
Gjatë një konference për media në Festivalin e Filmit në San Sebastian, gazetarja Maria Guerra e pyeti Jolie se çfarë e shqetëson më shumë si artiste dhe amerikane në raport me SHBA-në, pas peripecive që lidhen me pezullimin e prezantuesit Jimmy Kimmel nga televizioni ABC për komentet e tij mbi atentatin ndaj Charlie Kirk. Ky pezullim erdhi pas kërcënimeve për sanksione nga kreu i Komisionit Federal të Komunikimeve, Brendan Carr.
Angelina Jolie, e cila po promovon filmin e saj të ri Couture, u ndal për një moment para se të përgjigjej. Ajo e quajti pyetjen “shumë të vështirë” dhe u shpreh:
“E dua vendin tim… por, në këtë moment, nuk e njoh.”
Aktorja shtoi se gjithmonë ka pasur një këndvështrim ndërkombëtar për botën. “Gjithmonë kam jetuar ndërkombëtarisht. Familja dhe miqtë e mi janë ndërkombëtarë, dhe këndvështrimi im për botën është i hapur. Çdo gjë që kufizon shprehjen personale dhe liritë e individit është shumë e rrezikshme,” tha ajo.
Jolie gjithashtu theksoi se klima aktuale shoqërore kërkon kujdes në të shprehur dhe vetëdije për pasojat e fjalëve. “Po jetojmë në kohë shumë serioze dhe duhet të jemi të kujdesshëm, por do të them atë që ju të gjithë e dini,” përfundoi ajo.
Deklarata e aktorës nënvizon shqetësimet për kufizimin e lirisë së shprehjes dhe reflekton ndikimin e situatës aktuale sociale në SHBA mbi individët dhe artistët.
